၂၀၁၁ နှင့် ကျွန်မ

၂၀၁၁ ကို နာကျင်နေတဲ့ နှလုံးသားတစ်ခုနဲ့ လှမ်းခဲ့တဲ့ ကျွန်မ ၂၀၁၁ မှာတော့ ကြည်နူးပျော်ရွှင်မှုတွေနဲ့ ကြုံခဲ့ရတယ်..

၂၀၁၁ ဇန်နဝါရီမှာ ချစ်ဆုံး အမနဲ့ ကျိုက်ထီးရိုးနဲ့ ပြင်ဦးလွင် တူတူသွားခဲ့တယ်… ကျိုက်ထီးရိုး ရေတံခွန်နဲ့ ပြင်ဦးလွင်က ဓာတ်တော်ချိုင့် ရေတံခွန်တွေကို နှစ်စမှာ သွားခဲ့လို့ပဲလား ကျွန်မအတွက် ၂၀၁၁ ဟာ အခက်အခဲတွေနဲ့ ပျော်ရွှင်မှုတွေကို တပြိုင်ထဲ ယူဆောင်ပေးလာတဲ့ နှစ်ဆိုရင် ပိုများ မှန်နေမလား….

၂၀၁၁ ဖေဖော်ဝါရီမှာ MOSN အဖွဲ့က သူငယ်ချင်းတွေနဲ့ ကျိုက်ထီးရိုးကို ထပ်သွားဖြစ်တယ်.. အမှတ်တရ ခရီးပါဘဲ… ဖေဖော်ဝါရီရဲ့ အထင်ကရနေ့ ပြည်ထောင်စုနေ့ မေ့မေ့မွေးနေ့မှာတော့ ကိတ်မုန့်တစ်လုံး ကျွန်မဝယ်ပေးလို့ ပျော်ရွှင်စွာ ကျင်းပခဲ့တယ်… ကျွန်မနဲ့ မသက်ဆိုင်တော့တဲ့ ဖေဖော်ဝါရီ ၁၄ ရက်နေ့မှာ သူများအပျော်တွေကိုပဲ ကိုယ့် အပျော်လုပ်လို့ သူ့ကို ခဏမေ့ထားလိုက်တယ်…

၂၀၁၁ မတ်လမှာ ကျွန်မကို Asian Youth Forum က ရွေးချယ်လိုက်တယ်ဆိုတဲ့ စာကို ရခဲ့တယ်.. ကျွန်မဘဝမှာ အသွားချင်ဆုံး ခရီးတစ်ခုပါဘဲ.... နိုင်ငံတကာက လူငယ်တွေနဲ့ တွေ့ဆုံပြီးသူတို့ဆီက အပြုအမူ တွေ ယဉ်ကျေးမှုတွေကို ကျွန်မသင်ယူချင်နေမိတယ်.. ကျွန်မအတွက် inforithm-maze ရဲ့ ပုဂံ ခရီးစဉ်ဟာ ကျွန်မချစ်တဲ့ လုပ်ဖော်ကိုင်ဖက်တွေနဲ့ နောက်ဆုံးထွက်ခဲ့တဲ့ ခရီးဆိုတာ မသိခဲ့ပါဘူး… အပြောင်းအလဲတစ်ခု ကျွန်မပြုလုပ်ဖို့ အချိန်ကျခဲ့တယ်.. ၂၀၁၁ ဧပြီလ လက်ရှိအလုပ်ကို သိပ်ချစ်တဲ့ ကျွန်မ…. ဘဝနဲ့ အလုပ်ကို ရွေးချယ်ဖို့ ကြုံလာတဲ့အခါ ဘဝကို လက်ခံဖို့ စင်္ကာပူကို ထွက်လာခဲ့တယ်…. ကျွန်မအတွက် အဲဒီ ခရီးဟာ ဝမ်းနည်းမှု၊ ပျော်ရွှင်မှု နဲ့ ရင့်ကျက်မှု တို့ကို ရစေခဲ့တယ်.. သူများနိုင်ငံမှာ ကိုယ့်ကိုယ်ကိုယ် အားကိုးတတ်ဖို့ ကျွန်မလေ့ကျင့်ခဲ့ရတယ်…. စိတ်ဓာတ်တွေ အကြိမ်ကြိမ်ကျခဲ့ ပေမဲ့ အဲဒီ အတွေ့အကြုံတွေက ကျွန်မကို ဘယ်နိုင်ငံကို တစ်ယောက်ထဲ သွားသွား အဆင်ပြေအောင် သင်ပေးခဲ့တယ်… အခြေအနေ အကြောင်းကြောင်းကြောင့် စင်္ကာပူမှာ နေခွင့်မရခဲ့ လိုက်ပေမဲ့.. ကျွန်မအတွက် အလုပ်တစ်ခုက အသင့် ရှိနေခဲ့တယ်…. အရင်ကတော့ အလုပ်ကို ကိုယ်က လိုက်ရှာရပေမဲ့ အခုတော့ အလုပ်က ကိုယ့်ကို လိုက်ရှာ ခဲ့တယ်… အလုပ်ခန့်ပေးတဲ့ ကျွန်မရဲ့ ကျေးဇူးရှင်ကိုလဲ ကျေးဇူးတင်ပါတယ်..... အိုးမကွာ အိမ်မကွာ မြန်မာပြည်မှာ ကိုယ်ချစ်တဲ့ အလုပ်ကိုပဲ လုပ်ခွင့်ရလို့ ကျွန်မ ပျော်ခဲ့တယ်..

၂၀၁၁ အောက်တိုဘာလဟာ ကျွန်မအတွက် အခက်အခဲဆုံး နေ့ရက်တွေပါဘဲ.. Asian Youth Forum ကို မြန်မာနိုင်ငံမှာ သံရုံးမရှိတဲ့ နိုင်ငံမှာ ကျင်းပမယ်ဆိုတော့ ကျွန်မ ဘန်ကောက်ကိုဗီဇာသွားယူဖို့ပြင်ခဲ့တယ်.. တစ်ခါမှ ဗီဇာမလျှောက်ဘူးတဲ့ကျွန်မ လွဲချော်မှုတွေနဲ့ ဘန်ကောက်ကို နှစ်ခေါက်သွားခဲ့ရတယ်.. ဘန်ကောက်မြို့ဝန်းကျင် ရေကြီးနေတဲ့အချိန်ဖြစ်တဲ့အပြင် ကျွန်မတို့ရုံးက နိုင်ငံတကာ အစည်းအဝေးတစ်ခု ကျင်းပချိန်နဲ့တိုက်နေတာရယ်ကြောင့် ကျွန်မ တော်တော် အခက်အခဲဖြစ်ခဲ့ရတယ်.. ထိုင်ဝမ်သံရုံးက ရစ်သမျှကို ကျွန်မမှာ သည်းခံရင်း ဗီဇာမရရအောင် ယူခဲ့ရတယ်.. ဒုတိယအခေါက် ဗီဇာလျှောက်တုန်းက ဘန်ကောက်နဲ့ ရန်ကုန် နေ့ချင်းပြန်မယ်ဆိုပြီး လေယာဉ်လက်မှတ် ဝယ်ခဲ့ပေမဲ့ ရစ်တတ်တဲ့ သံရုံးဝန်ထမ်းကြောင့် လေယာဉ်နောက်ကျသွားခဲ့ရတယ်.. အစည်းအဝေးရှိတာကြောင့် နောက်နေ့မနက်အစော လေယာဉ်နဲ့ ကျွန်မ ရန်ကုန်ကို ပြန်ခဲ့ရတယ်.. ခက်ခက်ခဲခဲ ရလာတဲ့ဗီဇာကို ကြည့်လို့မဝခဲ့ဘူးး))

Oh.. နိုဝင်ဘာလ ကျွန်မဘဝအတွက် အမှတ်တရအဖြစ်ဆုံးပါဘဲ.. ကျွန်မရဲ့ နောက်ထပ် မိသားစုတစ်ခုကို Chientan youth Center မှာ တွေ့ခဲ့ရတယ်…. အားလုံးက ချစ်ဖို့ကောင်းနေပါတယ်.. မည်းသည် ဖြူသည် ချောသည် ရုပ်ဆိုးသည် ပုသည် ရှည်သည် ဆိုတာတွေ ရှိပေမဲ့ AYF Family ကတော့ အရာရာဟာ တူညီနေသလိုပါဘဲ… Forum ရဲ့ ခေါင်းစဉ်ဖြစ်တဲ့ Embracing One Humanity ဆိုတာ ကျွန်မအတွက် လက်တွေ့ သိလိုက်ရတာပါ.. အာဆီယံ နိုင်ငံ (၁၂) နိုင်ငံက လာတဲ့ (၇၇) ယောက်သော လူငယ်တွေဟာ မိသားစုတစ်စု လိုကို ဖြစ်ခဲ့ပါတယ်.. ကျွန်မတို့တွေ ယဉ်ကျေးမှုတွေ အသိပညာတွေ အတွေးအခေါ်တွေကို (၈) ရက်အတွင်း ဖလှယ်ခဲ့ရပေမဲ့.. (၈)သက် မေ့နိုင်မယ်မထင်ပါဘူး.. နေ့စဉ်နေ့တိုင်း လုပ်ခဲ့ရတဲ့ အရာတွေဟာ တစ်သားတည်း ဖြစ်စေခဲ့တယ်….မနက်တိုင်း အိပ်ရာက နိုးလာတဲ့အခါ ထိုင်ဝမ်က Chientan youth Center မှာမဟုတ်ပါလားလို့ တွေးမိတဲ့ အထိပါဘဲ…

ကျွန်မတို့မှာ မတူညီမှုတွေ ရှိနေတယ်..... ကျွန်မတို့ဟာ မတူညီတဲ့ နိုင်ငံတွေကလာတယ်.… .ဆံပင်တွေ အသားအရောင်တွေ ကွဲပြားနေပါလိမ့်မယ်.... တွေးခေါ်ပုံတွေ ကွဲပြားနေတယ်.... ယဉ်ကျေးမှုတွေ ခြားနားနေတယ်.. ဒါပေမဲ့ အခုဆို ကျွန်မတို့ မိသားစုဝင်တွေဟာ အာရှနိုင်ငံရဲ့ နေရာတိုင်းမှာ ရှိနေတယ်.. ဒီမိသားစုဝင်တိုင်းမှာ တူညီတဲ့ အတွေးတစ်ခုတော့ ရှိနေတယ်.. အဲဒါကတော့ မိမိတို့ရဲ့ မိသားစု ပတ်ဝန်းကျင်ကို အကောင်းဆုံးတွေ ပေးချင်နေတာပါဘဲ.... အခုဆို AYF မိသားစုဝင်တွေဟာ နိုင်ငံ (၁၂) နိုင်ငံမှာ ရှိနေပြီး နေရာအနှံမှာရှိတဲ့ ကျွန်မတို့ မိသားစုတွေ ကို ကာကွယ်စောင့်ရှောက် ချင်တဲ့စိတ်တွေ ဖြစ်လာ ခဲ့ပြီး တခြားသူတစ်ယောက်ရဲ့ ယဉ်ကျေးမှုနဲ့ အတွေး အခေါ်တွေကိုလေးစားတတ်လာတယ်.. AYF တွေ့ဆုံပွဲက ပြန်လာတဲ့ ကျွန်မတို့အားလုံး အဲစိတ်ဓာတ် လေးတွေကို ရင်ဝယ် ပိုက်ပြီး ပြန်ခဲ့ ကြသူချည်းပါဘဲ …. လူသားတိုင်းသာ အဲလိုဖြစ်ခဲ့ ရင် ကမ္ဘာကြီးမှာ စစ်နဲ့ နိုင်လိုမင်းထက် ကျင့်မှုတွေ လျော့နည်းသွားမှာပဲ….

၂၀၁၁ ဒီဇင်ဘာ မန်းလေးကို ubuntu ပွဲအတွက် ရောက်ခဲ့တယ်.. ခင်ဖို့ကောင်းတဲ့ ubuntu အဖွဲ့က အစ်ကိုတွေ… မန်းလေးက မောင်လေး ညီမလေးတွေကို ခင်ခွင့်ရခဲ့တယ်.. မန်းလေးက လူတွေက ရန်ကုန်ကလူတွေထက်တော့ ဟန်ဆောင်မှုကင်းတာ အမှန်ပါဘဲ.. အော် ဘာလိုလိုနဲ့ ၂၀၁၂ ကိုရောက်ပါဦးမယ်.. ၂၀၁၁ ဒီဇင်ဘာ နောက်ဆုံးညကို ကြည်နူးစွာ ကုန်ဆုံးချင်တယ်… ၂၀၁၂ ရေ ပျော်ရွှင်မှုတွေ အမှတ်တရတွေကို င့ါကိုပေးဖို့ စောင့်နေပါဦး

စိတ်ဓာတ်

တိုင်းပြည်တစ်ပြည်ကို GDP နဲ့တိုင်းတာတာတို့ .. ဘာတို့ ကျွန်မ သိပ်နားမလည်ပါဘူး.. ဒါပေမဲ့ .... ဘယ်လောက်ပဲ တိုင်းပြည်ကြီးက ကောင်းနေပါစေတော့ စိတ်ဓာတ်ကတော့ အရေးကြီးဆုံး အရာလို့ ကျွန်မနားလည်မိတယ်... စိတ်ဓာတ်နိမ့်နေရင် လူမျိုးနိမ့်နေမှာပဲလေ..

ကျွန်မအနေနဲ့ ကလေးစိတ်ပညာကို အထူးစိတ်ဝင်စားပါတယ် ဒါပေမဲ့ အခြေအနေအကြောင်းကြောင်းကြောင့် စာအုပ်တွေပဲ ဝယ်ဖတ်နိုင်ခဲ့ တယ်။ တစ်ခြားစိတ်ပညာဆိုင်ရာတွေကိုတော့ သင်တန်းတက်ဖြစ်ရင် တက်ဖြစ်ပါတယ်။ လူငယ်တွေဟာ နောင်လာမဲ့ အနာဂတ်ရဲ့ ခေါင်းဆောင်တွေလို့ သုံးကြတယ်။ ခေါင်းဆောင်ကောင်းဖြစ်ဖို့ လူငယ်အရွယ်ရောက်မှ စိတ်ဓာတ်ပြောင်းပေးလို့ မရနိုင်ဘူးလို့ ထင်ပါတယ်။ ငယ်ငယ်ကတည်းက မိဘ၊ ဆရာသမား၊ နိုင်ငံအကြီးအကဲ စတာတွေက အကောင်းဆုံး လေ့ကျင့်ပေးမှသာ စိတ်ဓာတ်မြင့်မားတဲ့ လူငယ်တွေ ကို ရရှိမှာပါ။ ကျွန်မကတော့ လူငယ်တွေကသာ အနာဂတ်ရဲ့ ခေါင်းဆောင်တွေဆိုရင် ကလေးတွေက လူငယ်တွေရဲ့ အနာဂတ်ပါလို့ ပြောချင်ပါတယ်။

ကျွန်မရဲ့ အတွေ့အကြုံနည်းနည်းလေး၊ ဦးဏှောက်သေးသေးလေးနဲ့ စဉ်းစားမိတဲ့ ဖြစ်ရပ်လေးတွေပါ

ဖြစ်ရပ် (၁)

ကလေးတုန်းက ကျွန်မတို့ အတန်းထဲမှာ ပြိုင်ဆိုင်ကြတယ်။ စာတော်ဖို့ ပြိုင်ကြတယ်။ ဆရာမချစ်ဖို့ ပြိုင်ကြတယ်။ ဆရာမက လိမ်မာတဲ့ ကလေးတွေကို ပိုချစ်တယ်။ စကားနားထောင်တဲ့လူချစ်တယ်။

အတန်းထဲမှာ ဆရာမက နာမည်မှတ်ခိုင်းတဲ့အခါ သူငယ်ချင်းတစ်ယောက် စကားပြောနေရင် ဆရာမ သူ စကားပြောနေတယ်လို့ ကျွန်မ ထောင်မိတယ်။ ဆရာမက သမီးက တော်လိုက်တယ်လို့ ချီးမွမ်းပါတယ်။ ဒါတွေဟာ ကျွန်မရဲ့ မသိစိတ်ထဲကို ငါဟာ သူတစ်ပါးကို ချောက်ချမှ ဆရာမချစ်တဲ့ နေရာတစ်ခု ရပါလားလို့ မသိမသာ စွဲသွားခဲ့တယ်။

ဖြစ်ရပ် (၂)

မေမေက ပြောတယ်။ ဒီတစ်ခေါက် အတန်းထဲမှာ အဆင့် (၁)ရရင် ကျွန်မလိုချင်တဲ့ စက်ဘီးလေး ရမယ်တဲ့။ ကျွန်မအတွက် အတန်းထဲက အဆင့် (၁) ကို မမက်ပေမဲ့ သူငယ်ချင်းတွေကိုတော့ ဒါက င့ါကိုမေမေက အဆင့် (၁) ရလို့ ဝယ်ပေးတာလို့ ကြွားချင်တာပေါ့။ ကျွန်မတကယ်ရတဲ့အခါ စက်ဘီးစီးမှာ စိတ်မချလို့ မဝယ်ပေးခဲ့ပါဘူး။ ကျွန်မစိတ်ထဲ အော် လိမ်တာဟာ မကောင်းတဲ့ လုပ်ရပ်မှမဟုတ်ဘဲ မေမေလဲ လိမ်သေးတာပဲ။ တစ်ခါတစ်လေ ငါလိမ်လဲ အပြစ်မရှိလောက်ဘူးပေါ့။မိဘတွေကိုယ်တိုင်က လိမ်တာကို မသိလိုက်ဘာသာ သင်ပေးနေမိတယ်။

(မှတ်ချက် ။ ။ မေမေ့စေတနာကို နားလည်ပါတယ်။ ဒါပေမဲ့ အဲအချိန် ပစ္စည်းတစ်ခုခုနဲ့ သမီးလဲယူပါလားလို့ ကျွန်မကို အခွင့်အရေး ပေးခဲ့ရင် )

ဖြစ်ရပ် (၃)

အိုးကောင်းနာနာရိုက်မှ လှတယ်တဲ့။ ကျွန်မတို့ရဲ့ ရှေးအစဉ်အလာကြီးပေါ့။ သူရဲ့သူငယ်ချင်းတွေကိုတော့ ကျွန်မ တော်ကြောင်း မေမေက အမြဲပြောပေမဲ့ ကျွန်မရှေ့မှာဆို ဘယ်တော့မှ မချီးမွမ်းခဲ့ပါဘူး။ ရောင့်တက်မှာစိုးလို့ပါ။ အိုးကောင်းလေး ဖြစ်စေချင်လို့ တဲ့လေ။ ဒါပေမဲ့ ကျွန်မအလိုချင်ဆုံး အမေတစ်ယောက်ရဲ့ ချီးမွမ်းခံမှုကို ကျွန်မ ခုချိန်ထိမရခဲ့ပါဘူး။ သင့်သားသမီးလဲ သင့်ချီးကျူးစကားကို ကြားချင်မှာပါ။ သင့်သားသမီးရှေ့မှာ ချီးမွမ်းဖို့ ဘယ်တော့မှ မမေ့စေချင်ဘူး။ ဒါဟာ နောင်တစ်ချိန် သူဟာ ယုံကြည်မှု ရှိတဲ့ လူငယ်တစ်ယောက် ဘဝကို ပိုင်ဆိုင်မှာပါ။

ဖြစ်ရပ် (၄)

ကျွန်မတို့ နိုင်ငံမှာတော့ လုပ်ရိုးလုပ်စဉ်တိုင်းလုပ်တဲ့အခါ အမြဲ အဆင်မပြေတာတွေပဲ တွေ့နေရတဲ့အခါ ဖြတ်လမ်းနီးလိုက်တာကိုက သာမာန်ဖြစ်နေသလို ဘယ်လိုလုပ်ရင် အဆင်ပြေတယ်ဆိုတာကိုတောင် မရှက်ဘဲ ဝေမျှပေးနေမိတယ်။ တစ်ခြားနိုင်ငံတွေမှာတော့ ငယ်ငယ်ကတည်းက ဘယ်လို စနစ်တကျလုပ်ရမလဲ သင်ပေးလိုက်တယ်။ ကျွန်မ စင်္ကာပူရောက်တော့ ဘယ်နေရာရောက်ရောက် တန်းစီရတယ်။ အဲဒါကို သိပေမဲ့ အိမ်သာမှာတောင် တန်းစီရတယ်ဆိုတာ ကျွန်မမသိခဲ့ဘူး။ အားလုံးက စည်းကမ်းရှိကြတယ်။ ကျွန်မတို့ လူမျိုးတွေကိုလဲ စည်းကမ်းရှိတဲ့ လူတွေဖြစ်စေချင်တယ်။

ဖြစ်ရပ် (၅)

ကျွန်မ လူမှုရေးလုပ်ငန်းတွေလုပ်တုန်းက သီလရှင်ကျောင်းတစ်ကျောင်းကို သွားခဲ့ပါတယ်။ ကလေးတွေကို ပျော်ပွဲရွှင်ပွဲ လုပ်ပေးတဲ့ နေ့ပေါ့။ အဲကျောင်းက ဆရာလေးက ကျွန်မတို့ အဖွဲ့နဲ့အဆင်ပြေပေမဲ့ ဆရာလေး ညီမက ကျွန်မတို့ကို ကလေးတွေဆီမှာ ပျော်ပွဲရွှင်ပွဲ မလိုအပ်ပါဘူး။ ဘာမှမဟုတ်တဲ့ အလှူမဖြစ်စလောက်လေးနဲ့ လာလှူနေတယ်လို့ အပြောခံခဲ့ရပါတယ်။ ကျွန်မတို့ တိုင်းပြည်က ကလေးတစ်ယောက်ရဲ့ လိုအပ်ချက်ကို ကြည့်မှာလား။ ကလေးတွေရဲ့ ကျောင်းက လိုအပ်ချက်ကို ကြည့်မှာလားဆိုတာ အဲမှာ ပေါ်လွင်ခဲ့တယ်။ ကျွန်မအခု လူမှုရေးလုပ်ငန်းလုပ်တာ ၄ နှစ်လောက်ရှိတဲ့အခါ ကျွန်မတို့ လိုအပ်ချက် တစ်ခုတွေ့ခဲ့ရပါတယ်။ ဒါကတော့

ကလေးတစ်ယောက်ကို ကျွန်မအနေနဲ့ သားသား အလိုချင်ဆုံး ဘာလဲလို့ သူ့ဆန္ဒကိုမမေးမိတာပါဘဲ။ ကလေးတစ်ယောက် ဆန္ဒထက် မိဘမဲ့ကျောင်းက ကျောင်းအုပ်ကြီးတွေ ဆရာမကြီးတွေရဲ့ ဒီကျောင်းမှာ ဘာလိုအပ်ပါသလဲလို့ မေးမိနေတယ်။ ကလေးတစ်ယောက် ဖွံ့ဖြိုးဖို့ ကစားကွင်းလေး၊ သူ့မှတ်ဥာဏ်လေးကို အသုံးချတတ်ဖို့ စဉ်းစားတွေးခေါ်ရတဲ့ ကစားစရာပစ္စည်းလေးတွေ တကယ်လိုပါတယ်။ ကလေးတစ်ယောက်မှာ ကစားတယ်ဆိုတာမရှိဘူး။ သင်ယူတာပဲရှိတယ်လို့ အစ်ကိုတစ်ယောက် ပြောတဲ့စကားကို အရမ်းသဘောကျမိပါတယ်။

သင်ကော ကလေးတစ်ယောက်ရဲ့ ဆန္ဒကို လေးလေးနက်နက် ပြုလုပ်ပေးဖူးပါသလား။

ကျွန်မသာ ကလေးတစ်ယောက်ဖြစ်ခဲ့ရင် ကျွန်မလိုချင်တာ ကစားစရာတွေပဲ ဖြစ်ပါလိမ့်မယ်။ သူတို့က ကျွန်မကို ချစ်ခင်တတ်စေတယ်။ ရိုသေတတ်စေတယ်။ စဉ်းစားတတ်စေတယ်။ သင်ယူစေတယ်။

အပေါ်က ဖြစ်ရပ်လေးတွေကို ကြည့်ပြီး ကျွန်မတို့မှာ စိတ်ဓာတ်မြင့်တင်ဖုိ့တွေ အများကြီး လိုနေတယ်လို့ မြင်မိတယ်။ စိတ်ဓာတ်ကောင်းတစ်ခု မွေးမြူဖို့ဆိုတာ တစ်ဦးတစ်ယောက်ထဲ မဟုတ်ဘဲ အကုန်လုံး ဝိုင်းလုပ်မှ ရမှာမို့ ကျွန်မ ဒီစာကိုရေးမိတယ်။ ကျွန်မရဲ့ဦးဏှောက်သေးသေးလေးနဲ့ ဥာဏ်စွမ်းမှီသလောက်ပါ။